Una prenda de poesia remunida in s'Archìviu.

Sas Laudes a Maria Immaculada de Salvadore Camboni Sechi.

Salvadore Camboni Sechi, Laudes a Maria Immaculada, Cagliari, Tip. Nazionale, 1869 

(AS-Nu, fondo bibliotecario Carlo Pinna, Miscellanea A 160, frontespizio)

S'8 de nadale sa Crèsia festat s'Immaculada Cuntzessione, e in s'Archìviu de Istadu de Nùgoro, in s'importante fundu bibliotecàriu de sa donatzione de su dr. Carlo Pinna, est arribadu unu libereddu (collocatzione: miscellanea A 160) iscritu dae Salvadore Camboni Sechi, preideru de Piaghe (SS), intituladu “Laudes a Maria Immaculada” publicadu in Tàtari dae sa Tipografia Natzionale, su 8 de nadale de su 1869. Su cumponimentu est bistadu dedicadu a su teologu de Bonorva Frantziscu Delrio, retore de sa crèsia parrochiale de Piaghe.

Su cumponimentu sighit sa forma de sos gosos, cun 25 istrofas de otonàrios e una torrada chi serrat onni istrofa:

De divinos risplendores

In Chelu ses coronada,

O Maria Immaculada

Proteggi sos peccadores.

Sa pius bella Creatura

Chi s'Altissimu formesit,

Tantas gratias Ti donesit

Senza numeru, e misura

Ses de Sionne ermosura

De Cades Palma esaltada.

O Maria Immaculada...

Matutina ses Istella

De su Sole pius lughente

Humana, Angelica mente

Non narant quantu ses bella

Pura, honesta Virginella

Pro nois Deificada.

De sos Campos ses su Lizu

Delicadu e senza neu,

Ch'has cunzebidu de Deu

S'immortale unicu Fizu,

Senza dolore e fastizu

Restende Casta Illibada.

Custos gosos ammentant chi est istadu Paba Pio IX a proclamare su dogma de s'Immaculada Cuntzessione pròpiu pro sa die 8 de nadale de su 1854 cun sa bulla Ineffabilis Deus:

Dae Deus inspiradu

Piu Nonu s'Immortale,

Su die octo de Nadale

Hat su Domma declaradu;

Oh momentu fortunadu

Roma attonita est istada!

E semper in custos versos si faeddat de sos turmentos bìvidos dae sa Crèsia de Roma, cun riferimentu a sos annos de sas gherras pro s'unidade de s'Itàlia e a sas religiones riformadas:

E già chi ses o Maria

Soberana si potente,

Sias ad ogni vivente

Amparu seguru e ghia;

Non bides no s'Eresia

Insuperbida, isfrenada?...

Cuntempla, o Mistica Rosa

De sa Ecclesia s'istadu,

Sempre a Piu Nonu amadu

Tue mira piedosa.

Giuditta Victoriosa

Su Re difende, s'Armada.

[…]

A su Paba e Re Romanu,

Toti l'ubbidant o Mama,

A sa Fide, tue giama

S'Idolatra e Luteranu,

E dae ogni Christianu

Sempre sias venerada.

Salvadore Camboni Sechi, Laudes a Maria Immaculada, Cagliari, Tip. Nazionale, 1869 

(AS-Nu, fondo bibliotecario Carlo Pinna, Miscellanea A 160, pp. 6-7)

Una pregadoria pro sa gente de sa Sardigna, chi agatat àmparu e recreu suta su mantu de sa Vìrgine, si leghet in sas ùltimas istrofas:

Mira ancora èa] sa Sardigna

Cum materna piedade,

In casu de adversidade

Sias propizia, e benigna

E dae sa Zente maligna

Non benzat mai infamada.

[…]

O Maria Protettora

Non sias in custu exiliu

E cum potente auxiliu

Difendenos ad ogn'ora,

Sias nos dispensadora

De ogni grazia sobrada.

O nostra Corredentrice,

Ama e difende costante

Sa ecclesia Militante

Hoe abbatida et infelize,

Pustis sa Patria felize

A totu siat donada.

Custos gosos, ispigru de sa devotzione de sos sardos pro Nostra Sennora, nos mustrant cantu manna fiat sa religiosidade populare, chi pregaiat e faeddaiat in sardu, e de comente puru sos òmines de crèsia l'impitaiant pro ispiegare e crarire cuntzetos de religione o de sas sacras iscrituras.