Alternàntzia iscola-traballu

Fintzas cust’annu s’Archìviu de Istadu de Nùgoro aderit a su progetu de s’alternàntzia iscola-traballu, proponende programmas de interessu.
Ma it’est s’alternàntzia iscola-traballu? Est una modalidade didàtica noa, chi, cun sos mèdios pràticos agiuat a afortiare sas connoschèntzias leadas in iscola e a proare cale siant sas  capatzidades de sas istudentessas e de sos istudentes “in su campu”. In prus depet fàghere prus rica sa formatzione e orientare sas àndalas de istùdiu e de traballu de sos giòvanos, gràtzias a progetos in lìnia cun sos disìgios insoro. S’alternàntzia iscola-traballu, obligatòria pro sos istudiantes de sos ùltimos tres annos de sas iscolas superiores (cumpresos sos litzeos) est una de sas noas prus de importu de sa lege 107 de su 2015 (connòschida comente Sa bon’iscola), in linia cun su printzìpiu de s’iscola aberta. Istudiu e trabàgliu comente unu “sistema duale” chi agiunghet sas particularidades de s’intessidura produtiva a sas tzircustàntzias sotziales e culturales.

Intre sos progetos ammaniados dae s’Archìviu in s'annu 2017-18, destinados a sos istudentes de sas iscolas de II° gradu, si ammentant: 

“Est bennida sa cartolina de leva... Devo tucare” (ischedadura de cantos fiant iscritos in sas listas de leva, de estratzione e in sos registros summàrios de sos tzircundàrios de Nùgoro, Aristanis e Lanusè);

“Sas terras de Gràtzia Deledda in su Monte Ortobene” (chirca intre sa documentatzione cartogràfica remunida in s’archìviu); 

“Sos annos de sa professione forense de Bustianu e Barore Satta in Nùgoro” (chirca in sos fascìculos de su fundu de su Tribunale tzivile e penale de Nùgoro). 

Su progetu “Sos pabiros sunt de totu” imbetzes est bistadu ofertu a totu sos tipos de utentes (antzianos, universidade de sa III° edade, sotzios e familias).