Sos archìvios de impresa nos contant

Pro un’istòria de sa  licorìssia.

Istemma de sa famìlia Amarelli, 1496

Cantas bias, in sas festas de sas biddas nostras, in mesu a sos sonos de bandas musicales, amus assagiadu, paris a sos turrones de Tonara e a sos mustatzolos de Aristanis, durches e bìculos de licorìssia? Forsis medas no ischint chi sa mèngius de licorìssia benit dae sas terras de sa Calàbria. Unu de sos prus importantes produtores de custos durchitos est sa dita Amarelli, rapresentada in su Noighentos dae Zosepe (1904-1990). Isse beniat dae una rica e nòbile famìlia chi, a sos printzipales traballos de sa campagna annanghiat sas faìnas de sa licorìssia giai dae su sèculu XVI, Zosepe paris a sos frades suos megiorant sa fàbrica e su protzessu de produtzione de custu alimentu, impreadu non solu pro fàghere durches ma puru, ammentamus·lu, in s'indùstria de sas meighinas, in sa produtzione de sos licores e in sa manifatura de su tabacu. Cun sa crisi de sos annos Trinta de su Noighentos, causada mescamente dae sas ditas americanas, sos frades Amarelli devent fàghere fronte a netzessidades noas, e depent duncas sighire a megiorare sa fàbrica e, a su matessi tempus, depent aumentare sas cantidades de licorìssia. In sos annos a poi de sa segunda gherra mondiale sighint s´ammodernamentu de sas màchinas e de su tziclu de produtzione, cosa chi lis permitit de fàghere fronte a s’intrada de fàbricas de durches noasb h. Oe in Rossano Calabro si podet consultare s’archìviu e bisitare su museu de sa licorìssia, bene culturale de importu pro connòschere custa bella istòria italiana.

Su ICAR at ammaniadu dae tempus, su giassu web de sos archìvios de impresa, chi nos mustrat sas castas de sos documentos chi contant generatziones de traballadores in sos vàrios setores de impresa. Su giannile est istadu fatu in s’annu 2009 pro fàghere connòschere e amare sos archìvios istòricos de sas impresas pùblicas e privadas italianas (e sardas). Su giannile est istadu ammaniadu cun sas setziones Portale (nos mustrat pro su prus su giassu), Sòtziu de sos sugetos pùblicos o privados chi contribuint a su giassu web), Cronologia generale e territoriale (datos subra s´isvilupu econòmicu intre su tempus), Protagonistas (biografias curtzas de sos òmines de impresa) e àteras setziones. Pro bisitare su giassu podes incarcare inoghe.

(figura cun licèntzia CC BY SA)