venerdì 26 ottobre 2018

Paraulas pro su chelu...

Invocatziones sardas.



Oe bos cherimus contare de una casta de pabiros, sos testamentos. A s'ispissu custos atos antigos comintzant cun una invocatzione, est a nàrrere una fòrmula simbòlica in ue chie testat implorat agiudu e àmparu a Nostra Sennora, a Cristu o a sos Santos pro chi l´agiuent in custu delicadu momentu. Bos proponimus paritzas invocatziones leadas dae sos atos notariles de Cullieri.

 
1618 nadale 5, Cullieri.
Testamentu de Antiogu de Roma.
«Pro cantu ogni una persona vivente in custa vida est suta posta / a Sa Morte Corporale de sa quale Nexunu si podet iscappare […] / et pro qui in su tale passu de sa Morte ogni bonu xpstianu est obbligadu de carrigare sa consiencia sua est lassare sas cosas / suas bene ordinadas in su servissiu de Nostru Señore Deus et discansu de sa anima sua / ». 
AS-NU, Atti notarili, Originali, Notai vari, Cuglieri città e ville, busta 1, cc. 6.
 

1633 bennàrgiu 12, Cullieri.
Testamentu.
«In Dei nomine amen. Sit omnibus notum comente sa morte corporale siat tantu suta / a sos umanos <...>  hora de Cudda In Suta est no qui a s’ora de su redemptore nostru Iesu / Cristu». 
AS-NU, Atti notarili, Originali, Notai vari, Cuglieri città e ville, busta 1, cc. 1-1v.

 
1693 santugaine 27, Culleri.
Testamentu de Maria Jusepa Serra.
«In nomen de sa Sanctissima et individua trinidade ba/bu, figiu et Spiritu Sanctu, dae su quale totu su mundu / est regidu et governadu, et comente sa morte corporale / siat tantu certa que dae cudda creatura nexuna posta / in carne humana scapare non si podet, segundu nos / lu narat su omnipotente Deus». 
AS-NU, Atti notarili, Originali, Notai vari, Cuglieri città e ville, busta 1, cc. 2.

 
1784 [abrile] 28, Sune.
Testamentu de Baquis Barru Soro.
«Baquis Barru Soro hat yamadu a mie cura[du] infrascritu pro / no tenner nottario presente pro alargare su presente sou testa/mentu et sende cun sa firma intendimentu sou et / loquella disponet sas cosas siguentes. / In primis et ante omnia incumandad sa anima sua / á Deus nostru Señore qui la ha facta et criada». 
AS-NU, Atti notarili, Originali, Notai vari, Cuglieri città e ville, busta 1, cc. 1-1v.

1784 nadale 6, Tinnura.
Testamentu de Thomas Carta Loque.
«In nomen de Sa Santissima trinidade Babu, figiu / et Spiritu Sanctu siat semper Amen. / Thomas Carta Loque solteri de sa dita villa, aga/tandisi infirmu de infirmidade corporale, sanu / inpero de sas potencias, et sentidos suos memoria, / intendimentu et firma loquella, considerande qui / sa cosa pius certa est sa morte, et sa hora pius / incerta de cudda, hat instadu à mie cura[du] infrascritu pro falta de notariu publicu alarque / su ultimu testamentu sou su qui est de sa / forma, et tenore siquiente / ».
AS-NU, Atti notarili, Originali, Notai vari, Cuglieri città e ville, busta 1, cc. 29-30v.

1 commento: