Presentatzione in s'Archìviu de su libru 

"Custu est unu paradisu terrestre" 

de Piera Porcu

 

Sa locandina de s'eventu

Sa die 14 de cabudanni 2018 a sas 5.30 de sera in sa sala de istùdiu de s'Archìviu de Istadu de Nùgoro, s'editore dutoressa Nèria de Giovanni e s'iscritore dut. Diego Satta ant a presentare su libru "Custu est unu paradisu terrestre" de sa iscritora Piera Porcu - Nemapress, 2017.
Si tratat de unu contu autobiogràficu inue s'autrice nos acumpàngiat intro sa vida pastorale de una famìlia chi, dae Orune, in su tzentru de sa Sardigna, si nche andat in àteros giassos de s'Ìsula, in sos annos chi andant dae prima de sa gherra fintzas a sa riforma agrària, peri bator generatziones. S'intrìtzant istòrias de dolu e de balentia, de amistade, de fratellàntzia, de disterru e de amore. Dae sa Barbàgia a su campu de Utieri e fintzas a sa bidda de Tula, inue sa iscritora bivet galu oe. Custu romanzu corale oferit fintzas ritos e usos de su pòpulu sardu, cun s'incantu de sa traditzione chi fintzas oe si agatat in sas biddas de intro, e bivet in s'ànima de chie amat sa Sardigna. 
Su libru est un'òpera de importu mannu, e tantas sunt sas boghes chi bantant s'iscritu. Comente sa de Piero Marcialis, regista e professore de limba sarda in Casteddu, chi cunsìgiat de lu lègere, in totu o in parte, in sas iscolas, pro sos ispuntos de istòria, limba e traditziones de Sardigna, dende modu a tantos pitzocos de imbennere temas pagu frecuentes de sa cultura nostra chi - a dolu mannu - si sunt perdende.