Su Ministru Bonisoli
in sos logos de sa cultura nugoresa
De Valèria Gianòglio - “La Nuova Sardegna” 26 austu 2018
(lìbera tradutzione a incuru de s’operadore de s’isportellu linguìsticu)
Est comintzadu dae Nùgoro, su 25 de austu passadu, s’àndala de su Ministru Alberto Bonisoli in sos logos de importu de sa cultura italiana. In sa sua prima bìsita in Sardigna, at seberadu su cabu-de-logu de sa Barbàgia pro pòdere abbaidare dae probianu sas cosas chi est fatende custa tzitade. Cuntentu chi Nùgoro siat arrivada intre sas tzitades chi sunt bintradas in sa rosa de sas finalistas de sa “Capitale italiana de sa cultura” (pro s’annu 2020), ma fintzas si no est andada bene sa prima borta at a andare mèngius sa segunda. Nùgoro – at sighidu su Ministru – at ammaniadu unu progetu chi at sensu, chi at postu raighinas in su territòriu, e chi devet andare a dae in antis in onni casu. Su ministru at bidu, cuntzentradu in pagu tempus, su mèngius de sa cultura materiale e immateriale de sa tzitade e de sa zona, acumpangiadu dae su sìndigu de sa comuna de Nùgoro Andria Soddu, dae s'assessore a sa cultura Sebastian Cocco e dae cussu a su turismu Valèria Romàngia. At àpidu puru modu de pòdere bìdere unu "dossier" in forma de lìttera, firmada dae s'assessore Cocco, inue benint fatas propostas culturales de importu pro su territòriu intreu, bene apretziadas dae Bonisoli, chi sighit a nàrrere de comente sa cultura siat pro Nùgoro unu puntu de crèschida e de bortada. A pustis at bisitadu s'Archìviu de Istadu, in carrera Mereu, inue, cun paris a su diretore Ànghela Andria Orani e a sa funtzionària de su polo museale de sa Sardigna Manuela Puddu, at àpidu modu de bìdere e connòschere sos pabiros e sas testimonias documentàrias de sa tzitade e de sa zona, acumpangiadu dae sa boghe, sempre galana, de Maria Carta. Su Ministru at pòtidu lègere fintzas sas cartas chi Lina Merlin, a s'època partigiana, iscriiat dae su cunfinu sou in Orune, o sos pabiros de Emìliu Lussu. E a pagos metros de distàntzia, in sa costa de Santu Nofre, Bonisoli at bidu sas prendas remunidas in s'Isre (chi meda galu connoschent comente "Museu de su costùmene"), adobiadu dae su presidente Zosepe Pirisi, dae sa responsàbile de su setore museos Franca Rosa Contu, dae s'assessore a sa Cultura de sa Regione Sarda Zosepe Dessena e dae sa senatrice de Nùgoro Elvira Evangelista. Sas istruturas (de valore, frunidas e primorosas) sunt prontas, serrat su Ministru, e agiunghet «isperamus de batire in Nùgoro semper prus bisitadores».
Podes lègere s'articulu originale incarchende inoghe suta
Podes lègere s'articulu originale incarchende inoghe suta
Podes imbènnere àteros articulos subra custu argomentu incarchende in sos giassos chi bides suta
Nessun commento:
Posta un commento