Presentadu su libru "Custu est unu paradisu terrestre" de Piera Porcu in s'Archìviu de Istadu

Sa sala de istùdiu

Chenabura colada est istada fata sa presentatzione de su libru Custu est unu paradisu terrestre de Piera Porcu presentadu in sa sala de istùdiu de s'Archìviu de istadu de Nùgoro. Gente meda at assìstidu a s'adòbiu culturale. Su diretore Ànghela Andrea Orani at fatu sos onores de domo, introduende sas relatoras Neria De Giovanni, editora e critica literària, e s'autrice Piera Porcu. Pro causas de saludu -- a dolu mannu -- no at pòtidu partetzipare s'antropòlogu Bachis Bandinu.

Sos atores legent unos cantos de su libru...

Una coralidade fata cun su mediu de sos atores Lella Cucca, Carmela Arghittu, Arcangelo Cossu, Antoni Appeddu e Teresa Davoli chi, acumpangiados dae s'impedradu musicale de Frantziscu Pais, ant retzitadu contos dae s'istoria personale de sa famìlia Porcu: sa gioventude in Orune de su babbu, fata de ammentos de pitzinnia e de disamistades, chi l'ant fatu leare sa detzisione de giumpare sos montes e andare in su Lugodoro intre Tula e Utieri, su "paradisu terrestre", "s'Egitu" comente naraiat su babbu de Piera, agiomai comente feteit Abramo andende in sa terra promissa. E unu paradisu est istadu, fatu de terras grogas de laore, de sentimentos de amistade e rispetu, de traballu e de sacrifìtziu, de disterru e de amore, in ue su cabu famìlia at postu raighinas, in ue s'est cojuadu e in ue sunt nàschidos sos figios, sunt crèschidos e ant afrontadu sas tantas proas de sa vida, bellas o feas.

Un'istoria garriga de emotziones chi afundant sas raighinas in su tempus passadu, in ue si mìschiant sas traitziones de sos mannos, s'impreu de sa limba sarda (in particulare sa variedade orunesa), sa vida fitiana de sa tziviltade de sos massaios e de sos pastores, bisuras sempre atzesas in su coro de chie las at connotas. Pro s'ocasione est istada mustrada una tàula litogràfica rafigurante sa bestimenta de Orune dae s'Album de costùmenes sardos de Ugo Martelli (Firenze, imprenta de P. Giusti, 1890 ca.) proveniente dae sa donatzione Carlo Pinna arribbada in Archìviu.

Sos tenores Nunnale de Orune ant cantadu in paritzos giassos de sa serada, partetzipende a s’incantu de sos presentes. Sa presentada est agabbada cun s’interventu de unu de sos presentes, su poeta Giuanne Pira de Orgòsolo, chi at retzitadu una poesia subra s’ammentu de sa campagna bida dae unu pastore betzu e, a pustis, at cantadu paritzas boghes cun paris a sos tenores, saludende cun allegria su bellu eventu culturale.

Sos tenores cun paris a Giuanne Pira