Sas funtes orales pro s´istòria

Un´intervista disconnota de Emilio Lussu agattada in Toscana

Fiat s´8 maju 1969 cando su giornalista e intelletuale Giuanne Bosio intervisteit Emilio Lussu. Ma de cussu documentu, una registratzione audio, si nde fint pèrdidas sas sèmidas. Sunt istados sos chircadores Antoni Fanelli e Valeriu Strinati chi, in sa nastroteca de s´Istituto Ernesto de Martino, ant imbènnidu custa prenda de importu mannu pro s´istòria sarda cuntempurànea. Sa boghe de Lussu nos contat s´istrada longa chi at fatu: dae sa pitzinnia in sa bidda sua, a sos pastores in sos sartos de Armùngia, a s´esperientzia de sa gherra europea, a sa luta antifascista, fìntzas a sos annos de su sotzialismu. In sos contos chi nde essint dae sas preguntas de Bosio agatamus sas peleas personales de su grande armungiesu e si podet iscurtare in parte de una Sardigna antigoria, in ue massàios e pastores sunt ligados a ritos antigos de traballu, e in parte de un´ìsula in gana de modernas (e pagu giaras) ideas de cambiamentu. S´importante chirca at a èssere presentada sàpadu 29 de cabidanni 2018 in s´Istitutu de Martino (localidade Villa S. Lorenzo, in sa bidda de Sesto Fiorentino, FI) e publicada in su nùmeru 28 de "Il de Martino", sa rivista de s´istitutu in ue, cun paris a sos interventos de istòricos e chircadores si at a imbènnere su CD cun su documentu audiu. Ant a presentziare puru rapresentantes de su sòtziu culturale de sos sardos in Toscana, de su sòtziu P. Mereu e de sa Fasi (Federazione de sos sòtzios de sos sardos in Itàlia). Pro nde ischire de pius bae a su giassu web de s´Istitutu Ernesto de Martino.