Letziones in s'Archìviu...

Comintzat su cursu de promotzione e difusione de sas atividades de s'Archìviu de Istadu de Nùgoro.

Sa locandina de su cursu

At a comintzare mèrcuris 17 de santugaine in s'Archìviu de Istadu de Nùgoro, unu cursu nou ammaniadu dae s'Istitutu de istùdios e chircas Camillo Bellieni de Tàtari subra sas atividades de s'Archìviu de Istadu de Nùgoro. In sas letziones in limba sarda, chi si ant a tènnere onni mèrcuris dae sas bator a sas ses de sero, si at pòdere leare connoschèntzia de sos ducumentos ùtiles pro fàghere chircas istòricas e pro ammaniare chircas genealògicas o subra sos atos catastales; si at pòdere connòschere sos pretziosos pabiros a testimonia de s'impreu de una limba antiga cun sa cale beniant iscritos testamentos o còmporas, rogados inventàrios o cuntratos de traballu. Una disamina acurada de sas tantas castas de documentos chi, de custu logu de importu pro sa cultura de totu su territòriu nugoresu, nde faghent una sienda manna. Su cursu, a s'indonu, est de 15 oras e at a èssere tentu dae sa diretora Ànghela Andrea Orani. Pro onni duda e informatzione e pro ischire àteras cosas chi pertocant siat su cursu siat sas letziones, sos chi sunt interessados podent cramare s'Istitutu (079 230268), s'Archìviu (0784 33476) o iscriere una lìtera eletrònica a s'indiritzu istitutobellieni@gmail.com. Bos isetamus!